Магілёўскае абласное кадэцкае вучылішча імя Героя Савецкага Саюза Я.Нікалаенкі стала ўжо сапраўднай вучэбнай пляцоўкай для маладых настаўнікаў Магілёўскай вобласці. Трэці год запар збірюцца тут настаўнікі беларускай мовы і літаратуры з розных школ рэгіёна, каб пераняць прафесійны вопыт навучання, каб знайсці адказы на праблемныя пытанні, якія звычайна з’яўляюцца ў настаўнікаў-пачаткоўцаў.
20 кастрычніка 2020 года вучылішча гасцінна прымала маладых калег. Для іх былі арганізаваны заняткі ў абласной школе маладога настаўніка беларускай мовы і літаратуры. Тэма гэтай сустрэчы – “Планаванне і самааналіз у дзейнасці настаўніка беларускай мовы і літаратуры”. Заняткі праводзіла настаўнік беларускай мовы і літаратуры Вараб’ёва Алена Анатольеўна. У ходзе працы педагогі абмеркавалі розныя віды планавання вучэбнай дзейнасці, формы праектавання ўрока і патрабаванні да плана вучэбных заняткаў. Асаблівая ўвага была звернута на парадак правядзення самааналізу ўрока – неад’емнага элементу ў праектаванні вучэбнай дзейнасці.
Але самае цікавае і запатрабаванае ў маладых калег – гэта, канечне, адкрыты ўрок. На гэты раз кадэты-дзесяцікласнікі працавалі на адкрытым уроку беларускай літаратуры па тэме “Цётка (Алаіза Пашкевіч). Лірыка”. Падчас аналізу ўрока настаўнікі адзначылі адбор зместу, форм (групавая і франтальная), метадаў (інтэратыўныя заданні, праблемныя пытанні, літаратурны аналіз), рацыянальнае размеркаванне часу, адведзенага на ўсе этапы ўрока, лагічныя пераходы паміж этапамі. Звярнулі ўвагу на адказнае стаўленне вучняў да падрыхтоўкі і працы на ўроку, былі крануты выразным чытаннем вершаў, а таксама ўражаны ўменнем аналізаваць лірычныя творы.
Асобна педагогі адзначылі матэрыяльна-тэхнічнае і эстэтычнае афармленне кабінета беларускай мовы і літаратуры, якое адпавядае сучасным патрабаванням і спалучае ў сабе мінімалізм і функцыянальнасць, інтэрактыўнасць і інфармацыйнасць.
Аддзел сцыяльна-гуманітарных дысцыплін УА “Магілёўскі дзяржаўны абласны інстытут развіцця адукацыі”. Кантактны тэлефон (0222) 400306